बिहिबार, २० कार्तिक २०८३
बिहिबार, २० कार्तिक २०८३
कञ्चनपुर। सामाजिक सेवाको भावना र सामुदायिक सहकार्यलाई व्यवहारमा उतार्दै वनसमिति युथ फोर्स (BYF) ले प्रयोगमा नआएका तर राम्रो अवस्थामा रहेका कपडा, जुत्ता, कम्बललगायतका आवश्यक सामग्री संकलन तथा निःशुल्क वितरण गर्ने अभियान सञ्चालन गरेको छ।
आफूसँग भएका तर प्रयोगमा नआएका सामग्रीलाई आवश्यकतामा रहेका व्यक्तिसम्म पुर्याउने उद्देश्यले सुरु गरिएको यस अभियानले एकातिर अनावश्यक रूपमा थन्किएका सामग्रीको सदुपयोग गर्ने र अर्कोतर्फ विपन्न तथा आवश्यकतामा रहेका व्यक्तिलाई सहयोग पुर्याउने लक्ष्य राखेको छ।
क्लबका अध्यक्ष अभिषेक चन्दका अनुसार अभियानअन्तर्गत इच्छुक व्यक्ति तथा परिवारले आफूले प्रयोग नगरेका तर पुनः प्रयोग गर्न मिल्ने कपडा, जुत्ता, कम्बल र अन्य आवश्यक सामग्री दान गर्न सक्नेछन्। संकलित सामग्रीको उचित व्यवस्थापन गरी आवश्यक व्यक्तिहरूसम्म निःशुल्क पुर्याउने व्यवस्था क्लबले मिलाएको छ।
अभियानले सहयोगलाई केवल आर्थिक दानमा सीमित नराखी आफूले प्रयोग नगरेका उपयोगी वस्तु अरूको आवश्यकता पूरा गर्ने माध्यम बनाउन खोजेको छ। विशेषगरी समुदायमा उपलब्ध स्रोतसाधनको पुनः उपयोग, मानवीय संवेदना र आपसी सहयोगको संस्कृतिलाई प्रोत्साहन गर्नु यसको सकारात्मक पक्ष हो।
क्लबले यस अभियानमा सहभागी भई सहयोग गर्न सबै व्यक्ति, परिवार तथा संघसंस्थालाई आग्रह गरेको छ।
दान तथा सम्पर्कका लागि:
फोन: ९८१२७५२५१२, ९८२४६२८१००
स्थान: वनसमिति, कञ्चनपुर, नेपाल
“BYF को प्रयास, तपाईंको साथ, न्यानो सुरुवात” भन्ने नारासहित अघि बढाइएको यस अभियानले एउटा महत्वपूर्ण सन्देश दिएको छ—हामीलाई अनावश्यक लाग्ने वस्तु अरू कसैका लागि अत्यन्त आवश्यक र मूल्यवान् हुन सक्छ।
सानो सहयोगले कसैको जीवनमा न्यानोपन, सम्मान र आशा थप्न सक्छ।
प्रतिक्रिया दिनुहोस