बैतडी , कार्तिक २९ ।
बैतडीको दुर्गम सिगास गाउँपालिका सडक सञ्जालसंग जोडिने भएको छ ।
सिगास गाउँपालिकाका विभिन्न ग्रामीण सडकहरुको डिपिआर तयार पार्ने काम शुरु भएको छ ।
गाउँपालिकाको केन्द्रसम्म समेत सडकको पहुँच नभएकाले गाउँपालिकाले सडक निर्माणलाई प्राथमिकतामा राखेको गाउँपालिकाका अध्यक्ष हरिसिंह धामीले जानकारी दिनुभयो ।
गाउँपालिकाले सडकहरुको विस्तृत परियोजना प्रतिवेदन (डिपीआर) निर्माणका लागि गाउँपालिकाका कर्मचारी खटाईसकेको अध्यक्ष धामीले बताउनुभयो ।
५ ओटा सडकको डिपीआर बनाएर निर्माण कार्य थालनि गर्ने अध्यक्ष धामीले बताउनुभयो ।
विफ्याकटाल–सौनखेत–गर्जे, विन्द्रावन –सिगास, गाँजरी–कुर्चीनेटा–थालाकाँडा,श्रीभावर–गन्सुर–दोगाड र देउलेक–दोगाड हुँदै मौरेबगर सडकको डिपीआर तयार पार्ने कार्य भईरहेको उहाँले बताउनुभयो ।
सडक निर्माणका लागि गाउँपालिकाले चालु आर्थिक बर्षमा चार करोड बजेट विनियोजन गरेको छ ।
सडकको पहुँचबाट टाढा रहेका नागरिकको सडक पहुँच पुर्याई उनीहरुको आर्थिक अवस्थामा सुधार ल्याउनका लागि गाउँपालिकाले पहल गरिरहेको अध्यक्ष धामीले बताउनुभयो ।
