कोरियाली विवाद: ट्रम्पद्वारा चीनको आलोचना

द्वारा : सुदुर न्युज

अमेरिकी राष्ट्रपति डोनल्ड ट्रम्पले उत्तर कोरियासँग चीनले व्यापार सम्बन्ध बढाइरहेको भन्दै आलोचना गरेका छन्।

उत्तर कोरियाले पछिल्लोपटक फेरि क्षेप्यास्त्र परीक्षण गरेपछि ट्रम्पको त्यस्तो प्रतिक्रिया आएको हो।

उक्त परीक्षणको प्रतिक्रियामा अमेरिका र दक्षिण कोरियाले संयुक्त रुपमा ‘बलिस्टिक’ क्षेप्यास्त्र प्रक्षेपणको अभ्यास गरेका छन्।

चीन र रुसले भने दुवै पक्षलाई सैनिक शक्ति प्रदर्शन बन्द गर्न आह्वान गरेका छन् र उत्तर कोरियामा सत्ता परिवर्तन गराउने प्रयासको विरोध गर्ने बताएका छन्।

रुसी विदेशमन्त्री सेर्गेइ लाभ्रोभले उत्तर कोरियाको संकटलाई बलपूर्वक समाधान गर्ने कुनै पनि कदमको रुस र चीनले विरोध गर्ने बताएका छन्।

उत्तर कोरियालाई आर्थिक रुपमा एक्ल्याउने प्रयासको पनि ती दुई देशले विरोध गर्ने उनले बताएका छन्

उत्तर कोरियाका थुप्रै परीक्षणमध्येको सो पछिल्लो परीक्षणले संयुक्त राष्ट्रसंघको सुरक्षा परिषद्को प्रतिबन्धको उल्लंघन गरेको थियो।

यसै हप्ता परीक्षण गरिएको सो क्षेप्यास्त्र अमेरिकाको अलास्का राज्यसम्म पुग्न सक्ने विज्ञहरुको अनुमान छ।

अमेरिकाले सो विषयमा छलफल गर्नका लागि तुरुन्तै सुरक्षा परिषद्को बैठक डाक्न माग गरेको छ। १५ सदस्यीय सो निकायको गोप्य बैठक बुधबार हुँदैछ।

अमेरिका र दक्षिण कोरियाको उत्तरलाई चेतावनी

उत्तर कोरियाको सरकारी समाचार संस्थाका अनुसार सर्वोच्च नेता किम जोङ अनले ‘अमेरिकाको स्वतन्त्रता दिवसको उपलक्ष्यमा अमेरिकीहरुलाई उपहार’का रुपमा सो परीक्षण दिएको बताएका थिए।

उनले अमेरिकीहरुलाई त्यस्ता उपहार दिइराख्न अधिकारीहरुलाई निर्देशन दिएको पनि बताइएको छ।

उत्तर कोरियाले संसारको कुनै पनि कुनामा प्रहार गर्न सक्ने अन्तरमहादेशीय बलिस्टिक क्षेप्यास्त्र विकास गरेको दाबी गरेको छ तर दक्षिण कोरिया लगायत अन्य देशका विज्ञले भने त्यसमा संशय व्यक्त गरेका छन्।

तर उत्तर कोरियाको हतियार विकासको गतिलाई हेर्दा उसले पाँच देखि १० वर्षमा अमेरिकामा प्रहार गर्न सक्ने हतियार बनाउन सक्ने केही विज्ञको विश्वास छ।

सम्बन्धित् समाचारहरु

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy